الأربعاء، 29 أكتوبر 2014

هلالات مالحين غاية اللدة

السلام عليكم انيقاتي الغاليات مبروك عواشركم 
وسنة هجرية سعيدة دائما



هاد الهلالات كيجيو مداق ولدة انشاء الله تعجبكم 
المقادير 
125 غ زبدة 
2فرماجات مثلثين 
نصف ملعقة صغيرة ملح 
ملعقة كبيرة جنجلان
دقيق وما تهز 
ممكن تضوبلي المقادير وتنوعي في الاشكال طبعا 
التزين 
مشطة 
اصفر بيض 
وفرماج احمر محكوك 
الطريقة 
حكي الزبدة مزيان مع المحة والفرماج وزيدي الجنجلان ثم الدقيق انا يا الله هزتلي 200غ فرينة بالتقريب 
جمعي العجينة خليها ترتاح نصف ساعة ومديها بالدلاك وضربيها ضربات خفاف بالمشط وشكليها هلالات 
دهنيهم باصفر البيض وحطي الفرماج محوك والا الفرن سخون وناقص 
متاخدش بزاف الوقت في طياب 
تابعو المراحل والصور 








السبت، 27 سبتمبر 2014

الطنجية من مطبخي

هاد المقادير ديال الطنجية المراكشية في كوكوت ... تجي لديدة....بغيت نفيدكم بها 

المقادير 
كتديري اللحم القياس ديالك العطرية تكون على حساب اللحم البزار السكنجبير الخرقوم والكامون يكون بزايد تقريبا 2م كبار اللبابة ديال المصير كنقطعها طريفات صغار شوية السمن وشوية الكوزة محكوكة ووريقة سيدنا موسي وشوية القزبوريابس مطحون الثومة ونصف كاس زيت العود و2 كيسان الماء تسدي الكوكوط وتخلطي مزيان باش اللحم يشرب العطرية وتديريها فوق البوطة حتى تدور الصفارة وتنقصي عليها البوطة مزيااااااااااااااااااااااااان وتعطيها وقتها حتى تطيب ولا حليتي عليها ولقيتيها طابت وباقي المرق تشربيها مزيان راه المرق ديالها يجي معلك وزوين


هاهي فاش حليت عليها باقي فيها لبلول زد شحرتها شوية 


هنا فاش تشحرت مزيان...للي ميبغيش لبلول بزاف اما هو راه بنين ومعلك .....الصورة موضحاش مزيان البخار غالب عليها وسمحولي مصورتش طبق التقديم لحقاش طارو الشطار وملحقت على والو 




الجمعة، 26 سبتمبر 2014

غريبية باللوز والجنجلان وزبيب


حبيباتي كيف كتعرفو غريبة ديال اللوز انواع واشكال والنتيجة واحدة الا وهي تجي لديدة وهادي مقادير تعطي نتيجة ترضيك وتحمر ليك وجهك 

المقادير 
125غ  :زبدة انا استعملت ماكدور 
كاس سنيدة 
كاس زيت 
2 معالق لوز محمر بقشوره في الفران ومهرمش 
2 معاق جنجلان صحيح 
2 معاق زبيب مرطب في ماء زهر نصف ساعو ومقطع رقيق بزاف 
2 خمارت
دقيق وما تهز 
الطريقة 
نخدمو الزبدة مع السكر ثم الزيت ونزيد الجنجلان واللوز وزبيب ودقيق ونجمعو عجينتنا ونخليها تبات ليلاة عاد نزيد الخمارات وندلكها مزيان ونشكلها كرات او اي شكل بغينا 
فاش طيب حطي التزيين لي بغيتي او فنديها فقط في سكر كلاصي 
تابعن المراحل 






الخميس، 25 سبتمبر 2014

حلوى هشيشة بمايزينا ونسكافي



المقادير 
250غ زبدة 
كاس سكر كلاصي
200 غرام مايزينا 
نصف خمارة بكين باودر 
2 اصفر بيض 
3 نسكافي محكوكين 
الدقيق حسب الحاجة 
الطريقة 
كما هو موضح في الصورة انا عملت المقادير مدوبلا كان عندنا مناسبة في العائلة 
اولا نحكو الزبدة مع السكر ونسكافي ونزيد صفار البيض ثم الخمارة ومايزينا ثم الدقيق 
نحربل العجين المحصل عليه على شكل طويل ونقطع الحجم لي بغيتي وندخلها للفران حتى طيب ونغمسها في حمام شكلاط اسود او ابيض ونزينها بالشكل لي بغيت 
احيانا نغمسها في الشكلاط ابيض ونفندها في طونيك ديال درهم كتجي اروع ما يكون شكلا وبعض المرات نرش عليها لوز مقلي ومطحون 
لكم الاختيار اخواتي 







الأربعاء، 24 سبتمبر 2014

كيكة بالبرتقال مع صلصة رائعة

المقادير
3 بيضات
2كيسان سنيدة يضربو مزيان في مولنكس 
كاس الا ربع زيت 
كاس الرايب عامر عصير برتقال
2 خمارات حمراء
الدقيق 
الطريقة نضربو الجميع في مولنكس ماعدا الخمارة والدقيق
العجينة تكون بحال البغرير خاثرة مزيان مزيان وماشي خبز هههههه..

صلصة البرتقال


التزيين بكريما عصير البرتقال
كاس كبير عصير
بيضة كاملة
4 معالق سنيدة او حسب الدوق
ملعقة كبيرة مايزينا
خلطي الجميع فوق النار حتى يعقاد




حرشة في الفران منسمة وبنينة

المقادير 
500 غ سميدة 
ملح
نصف كاس سكر
كاس مخلط زيت وزبدة 
نصف ملعقة صغيرة خمارة رفيعة حبوب
1لافاني 
1 خمارة حمراء 
ملعقة جنجلان محمر 
ملعقة زريعة الكتان محمرة ومطحونة 
ماء لجمع العجينة 
الطريقة 
اجمعي النواشف اولا كل من سميدة والملح والسكر والجنجلان وزريعة الكتان محمرين ومطحونين .اضيفي خمارة الخبز حبوب وخمارة الحلوى بكين باودر والفاني خلطي مزيان اضيف كاس الزبدة المدابة المخلوط مع الزيت خلطي الجميع باطراف الاصابع حتى يتشرب السميد كمية الدهن ثم اضيفي الماء ..العجينة مطلوقة شوية خدي كريات حجم للي تفظلين ومرمديهم في دقيق احرش ..رصي الكريات في مول مدهون بالزبدة ومرشوش بالدقيق الاحرش وطيبيهم في الفرن مسخن من قبل وناقص طيبيهم في الطبقة السفلى باش يتشققو ليك عاد طلعيم الفوق 

المهم اخواتي .. هاد لحريشات غاية اللدة...نتمنى تجربوهم 

الأحد، 21 سبتمبر 2014

تقيطعات بيبي بطريقة سريعة تنفع للعشاء

كنحتاجو لطريفات اللحم مقطعين مربعات انا عملت بيبي تقدرو تعملو حتى لحم البقري او الغنمي
بصلة مشلضة 
 ملح .
 القزبر 
معدنوس مقطعين
. م ص مركز الطماطم
. زيت الزيتون 
ابزار . كمون . تحميرة .  و شوية الخرقوم و شوية لهريسة

كناخدو الكوكوت و نعملو فيها الزيت و البصل و نحركوه حتى يدبل 
من بعد نضيفو اللحم و نقليوه شوية عاد نضيفو العطرية و الربيع و مطيشة الحك 
نخلطو كلشي من بعد نعملو نصف كاس صغير ديال الما و نسدو الكوكوت تقريبا 10د و نحلو عليه
ها هو واجد و مشرب كيجي غزااال
النار تكون مهيلة طبعا
نقدموه ساخن بالصحة و الراحة