الذ بايلا

حبيباتي الغاليات الحادكات ..اليوم وانا في الكوزينة كالعادة نوجد البايلا تفكرتكم وانا نجيب البورطابل ونصور ليكم بعض مراحل البايلا باش تستافدو بطريقتي كيف ما انا ديما نستافد بطرقكم في مجال الطبخ والمطبخ ...

هانتوما وخا ما صورتش المراحل الاولى غدي تفهمو لان الطريقة ساهلة ماهلة والمقادير عندي مضبوطة وعائلية ...

المقادير 

نصف كيلو ديال الروز طويل اصفر مغسول و مصفي (نعبرو القياس ديالو بالزلافة و نديرو ضعفه ماء) عطاني جوج زلايف ارز

2مطيشات محكوكين

2بصلات مقطعين شرائح

ضامة بنة حوت للاسف كتعجبني في البايلا ولكم الاختيار 

2فلفلات ملونين مقطعين دوائر

نصف زلافة ديال الجلبانة

خيزو منقي و مقطع قطع صغار

رابعة ديال صدر الدجاج مقطع صغير

رابعة كلامار مقطع دوائر

رابعة كروفيت مصلوق و مقشر (نحتفظ ب 5 او 6 حبات للتزيين و كذلك نحتفظ بماء الصلق-

رابعة بوزروك مقشر ممكن الاستغناء عنه

2 اوراق سيدنا موسى

زعفران + ملح + ابزار + سكينجبير

التزيين

حامضة طرية مقطعة دوائر

حبات الكروفيت مصلوقين اللي نقصنا

الطريقة 

في كوكوت نديرو مطيشة و البصلة و الضامة و الفلفلة و الدجاج و كل العناصر اللي عندنا ما عدا الكروفيت و نديرو التوابل و نديرو معاهم الزيت ثم نسدو عليهم يطيبو من15 الى 20 دقيقة

ثم نديروهم في اناء خاص بالبايلا كيكون غارق شوية 

كنديرو الروز في مقلة مع 2 معالق كبار زيت و شوية الملح و البزار و نخليوه يتشحر من 5 الى 7 دقائق حتى يصفار اللون ديالو

ثم يضاف للعناصر اللي فالمول و نضيف الكروفيت و نديرو 2 قياسات ماء لكل قياس ديال الروز و نبداو بالماء اللي صلقنا فيه الكروفيت

و نخلطو العناصر مزيان باش تنساجم مع بعضها ثم نديرو الاناء فوق البوطة على نار مهيلة و نضغطو على الوجه بملعقة باش يتساوى و نخليوها حتى يبدى الروز يدخلو الطياب عاد نزولو المول من فوق البوطة و ندخلوه للفران من 7 الى 10 دقائق انا هاد المرحة الاخيرة مدرتهاش هاد المرة وخليتها كملت طيابها فوق البوطة

نزين الوسط البايلا بالكروفيت والجوانب بدوائر الحامض ..او اي تزيين حب الخاطر ...

انشاء الله يكون الشرح ديالي مفهوم ...

اوا تفظلو بسم الله