الطنجية من مطبخي

هاد المقادير ديال الطنجية المراكشية في كوكوت ... تجي لديدة....بغيت نفيدكم بها 

المقادير 

كتديري اللحم القياس ديالك العطرية تكون على حساب اللحم البزار السكنجبير الخرقوم والكامون يكون بزايد تقريبا 2م كبار اللبابة ديال المصير كنقطعها طريفات صغار شوية السمن وشوية الكوزة محكوكة ووريقة سيدنا موسي وشوية القزبوريابس مطحون الثومة ونصف كاس زيت العود و2 كيسان الماء تسدي الكوكوط وتخلطي مزيان باش اللحم يشرب العطرية وتديريها فوق البوطة حتى تدور الصفارة وتنقصي عليها البوطة مزيااااااااااااااااااااااااان وتعطيها وقتها حتى تطيب ولا حليتي عليها ولقيتيها طابت وباقي المرق تشربيها مزيان راه المرق ديالها يجي معلك وزوين

هاهي فاش حليت عليها باقي فيها لبلول زد شحرتها شوية 

هنا فاش تشحرت مزيان...للي ميبغيش لبلول بزاف اما هو راه بنين ومعلك .....الصورة موضحاش مزيان البخار غالب عليها وسمحولي مصورتش طبق التقديم لحقاش طارو الشطار وملحقت على والو 

غريبية باللوز والجنجلان وزبيب

حبيباتي كيف كتعرفو غريبة ديال اللوز انواع واشكال والنتيجة واحدة الا وهي تجي لديدة وهادي مقادير تعطي نتيجة ترضيك وتحمر ليك وجهك 

المقادير 

125غ  :زبدة انا استعملت ماكدور 

كاس سنيدة 

كاس زيت 

2 معالق لوز محمر بقشوره في الفران ومهرمش 

2 معاق جنجلان صحيح 

2 معاق زبيب مرطب في ماء زهر نصف ساعو ومقطع رقيق بزاف 

2 خمارت

دقيق وما تهز 

الطريقة 

نخدمو الزبدة مع السكر ثم الزيت ونزيد الجنجلان واللوز وزبيب ودقيق ونجمعو عجينتنا ونخليها تبات ليلاة عاد نزيد الخمارات وندلكها مزيان ونشكلها كرات او اي شكل بغينا 

فاش طيب حطي التزيين لي بغيتي او فنديها فقط في سكر كلاصي 

تابعن المراحل 

حلوى هشيشة بمايزينا ونسكافي

المقادير 

250غ زبدة 

كاس سكر كلاصي

200 غرام مايزينا 

نصف خمارة بكين باودر 

2 اصفر بيض 

3 نسكافي محكوكين 

الدقيق حسب الحاجة 

الطريقة 

كما هو موضح في الصورة انا عملت المقادير مدوبلا كان عندنا مناسبة في العائلة 

اولا نحكو الزبدة مع السكر ونسكافي ونزيد صفار البيض ثم الخمارة ومايزينا ثم الدقيق 

نحربل العجين المحصل عليه على شكل طويل ونقطع الحجم لي بغيتي وندخلها للفران حتى طيب ونغمسها في حمام شكلاط اسود او ابيض ونزينها بالشكل لي بغيت 

احيانا نغمسها في الشكلاط ابيض ونفندها في طونيك ديال درهم كتجي اروع ما يكون شكلا وبعض المرات نرش عليها لوز مقلي ومطحون 

لكم الاختيار اخواتي 

كيكة بالبرتقال مع صلصة رائعة

المقادير

3 بيضات

2كيسان سنيدة يضربو مزيان في مولنكس 

كاس الا ربع زيت 

كاس الرايب عامر عصير برتقال

2 خمارات حمراء

الدقيق 

الطريقة نضربو الجميع في مولنكس ماعدا الخمارة والدقيق

العجينة تكون بحال البغرير خاثرة مزيان مزيان وماشي خبز هههههه..

صلصة البرتقال

التزيين بكريما عصير البرتقال

كاس كبير عصير

بيضة كاملة

4 معالق سنيدة او حسب الدوق

ملعقة كبيرة مايزينا

خلطي الجميع فوق النار حتى يعقاد

حرشة في الفران منسمة وبنينة

المقادير 

500 غ سميدة 

ملح

نصف كاس سكر

كاس مخلط زيت وزبدة 

نصف ملعقة صغيرة خمارة رفيعة حبوب

1لافاني 

1 خمارة حمراء 

ملعقة جنجلان محمر 

ملعقة زريعة الكتان محمرة ومطحونة 

ماء لجمع العجينة 

الطريقة 

اجمعي النواشف اولا كل من سميدة والملح والسكر والجنجلان وزريعة الكتان محمرين ومطحونين .اضيفي خمارة الخبز حبوب وخمارة الحلوى بكين باودر والفاني خلطي مزيان اضيف كاس الزبدة المدابة المخلوط مع الزيت خلطي الجميع باطراف الاصابع حتى يتشرب السميد كمية الدهن ثم اضيفي الماء ..العجينة مطلوقة شوية خدي كريات حجم للي تفظلين ومرمديهم في دقيق احرش ..رصي الكريات في مول مدهون بالزبدة ومرشوش بالدقيق الاحرش وطيبيهم في الفرن مسخن من قبل وناقص طيبيهم في الطبقة السفلى باش يتشققو ليك عاد طلعيم الفوق 

المهم اخواتي .. هاد لحريشات غاية اللدة...نتمنى تجربوهم 

تقيطعات بيبي بطريقة سريعة تنفع للعشاء

كنحتاجو لطريفات اللحم مقطعين مربعات انا عملت بيبي تقدرو تعملو حتى لحم البقري او الغنمي

بصلة مشلضة 

 ملح .

 القزبر 

معدنوس مقطعين

. م ص مركز الطماطم

. زيت الزيتون 

ابزار . كمون . تحميرة .  و شوية الخرقوم و شوية لهريسة

كناخدو الكوكوت و نعملو فيها الزيت و البصل و نحركوه حتى يدبل 

من بعد نضيفو اللحم و نقليوه شوية عاد نضيفو العطرية و الربيع و مطيشة الحك 

نخلطو كلشي من بعد نعملو نصف كاس صغير ديال الما و نسدو الكوكوت تقريبا 10د و نحلو عليه

ها هو واجد و مشرب كيجي غزااال

النار تكون مهيلة طبعا

نقدموه ساخن بالصحة و الراحة

حلويات من تطبيقاتي

حليوات ام العربي جربتهم في واحد المناسبة جاو فنين 

الروابط كالاتي 

حلوة دواز اتاي اقتصادية

حلوة بالثمر رطبة رطبة

بسم الله الرحمن الرحيم

حلوة دواز اتاي اقتصادية

المقادير

250غ زبدة رطبة

كاس سكر كلاصي

كاس نشا

1 خميرة الحلوى

3 اصفر البيض

دقيق حسب الخليط

للتزيين ماء الزهر وسكر كلاصي للتفند

الطريقة:::::

نخدمو الزبدة مع السكر حتى تنسجم جيدا +اصفر البيض+النشا+الخميرة والدقيق حتى نحصل على عجينة لينة ورطبة بحال عجين الصابلي

نعمل العجين على شكل حرابل تقطع على شكل  مقروط يصفف في طاوة  وتدخل الفرن حتى تنضج

بعد دلك نغطسها في ماء الزهر وتفند في السكر كلاصي  وتقدم بالصحة والراحة

حلوة بالثمر رطبة رطبة

لمقادير

العجينة

نصف كيلو الزبدة

كاس الا ربع زيت بكاس العنبة نعبرو

2 بيضات

كاس عنبة ماء الزهر

1 خميرة الحلوى

كاس عنبة سكر كلاصي

حشوة الثمر

كيلو التمر معجون + القرفة+الكوزة محكوكة+ 2 م ك زبدة لينة +م ك سكر كلاصي+ قبصة القرنفل مدقوق 

نخلطو الكل ونعملوهم كويرات صغار

كنخدمو الزبدة مع السكر كلاصي حتى يندمجو نضيفو الزيت نضيفو البيض نضيفو ماء الزهر نضيفو الخمارة والدقيق وبقية التشكيل بالصور

كنفدوها في السكر كلاصي 

وبالصحة والراحة نتمنى تعجبكم

فقاص اللوز

3 بيضات 

خمارة ونصف 

كاس زيت 

كاس سنيدة 

1 فاني 

150غ كل مكان كتير تيجي زوين كنرطبوا واحد الساعة فالماء البارد من بعد مانكون فرقتوا على النصف فالطول 

نصف كاس جنجلان محمص وشوية نافu شوية ملح طبعا 

الدقيق تقريبا نصف كيلو الا كان حجم البيض كبير 

المهم العجينة كتجي شادا راسها 

الطريقة 

نخلط البيض وسنيدة والزيت والملح ولفاني نخلطهم مزيان 

من بعد نزيد اللوز وعاد الطحين وخميرة الحلوى بشوية بشوية حت نحس

من بعد نقسموا كويرات على حسب الرغبة واش بغيتوا عريض اوكبير او متوسط نشكلوهم حربول طويل وبسطوهم غير شوية بالد باش ميطلعوش بزاف ومايتشققوش اثناء الطهي 

ندهنوا باصفر البيض مع شؤية نسكافي ونشرطوا بالفورشيط 

ويطهى في فرن بارد على نار هادئة حتى يشد مزيان راسو بلا ما يتحمر 

غير نخرجوه نغطيوو بفوطة غمسناها في ماء الزهر وجلد خفيف نخليوو يبرد مزيان عاد نقطعوه باش ميتهرسش اثناء التقطاع

صينية الحمام المحشي والخضر وجبة متكاملة

المقادير 

حمام العدد للي بغيتي او على حساب عدد الاشخاص

150غ كفتة

بصلة كبيرة او جوج صغار 

معدنوس 

فصين ثوم

زيت وملح  ابزار وتحميرة وخرقوم

خضر مشكلة هنا استعملت بطاطس وجزر وممكن قرع اخضر وفلافل الوان  

مزود حار 

بصل صغير

الطريقة 

شحري البصل والكفتة مع اضافة التوابل والمعدنوس اتركي الخليط يبرد ثم احشي الحمام بهده الخلطة لا تنسي ان تضعي الحشوة بين الجلد واللحم 

اغلقيها باعواد الاسنان  ورصيها في مول خاص بالفرن 

قطعي الخضر حسب الرغبة ونسميها بابزار وشوية تحميرة وسكين جبير وملح وربع كاس زيت

ضعي الخضر في الصينية  واضيفي كاس صغير من الماء وغطيها بورق السيرفيريزي ثم الالمنيون واتركيها تنضج في الفرن لمدة ساعتين على الاقل لان الحمام يحتاج وقته لكي يطهى جيدا 

وشهية طيبة