السبت، 8 فبراير 2014

د سباكيتي بمرق الدجاج من مطبخي بالصور


لبنات اليوم حبيت نحط لكم هاد الطبق لي يعجب وليداتي ...كيفظلوها بهاد الطريقة على الطريقة الاخرى المعروفة ديال صوص ماطيشا
المقادير 


طريفات دجاج انا استعملت الاجنحة ولقشاوش فقط
2 بصلات متوسطين
زيت ملح
سكين جبير وخرقوم وشوية هريسة وزعفران وفلفل احمر وقرقة وربع ملعقة كاري
فلفلة مقطعة خضراء
ملعقة ماطيشا ديال الحك
معدنوس طري
وسباكيتي مدهونة بالزيت وغير مسلوقة
الطريقة نصبو الكوكوت ديالنا عادي نقليو لحيمات مع البصلة والملح نزيد الماء والتوابل ونغلق عليهم حتى يطيبو من بعدنفتح ونزيد ماطيشا ديال الحك والمعدنوس وندهن سباكيتي بشوية زيت ونحطها طيب ..نحرك مزيان باش متبقاش لاصقة مع بعضياتها ..ونزيد الماء سخون على حساب طياب سباكيتي
هنا ناتي للمرحلة المهمة ..
يمكن تخليوها طيب هكدا مع التحريك كل 5 دقائق حتى طيب .. بالنسبة لطريقتي كنحط سباكيتي ناشفة نحرك واحد 3 دقائق ونغلق عليها كوكوت تصفر 5 دقائق او 6 من على نار متوسطة من بعد نطفي عليها ونخلي كوكوت بالصفارة ديالها مدة نصف ساعة ونفتح عليها ...نلقاها شربت ماءها والحبات مفروزة
هاد سباكيتي كيجي مداقها ممتاز لانها تتشرب مزيان مداق البويون لي طابت فيه



وها هي سباكيتي بنينة ومشي معجنة وحباتها مفروزين 

نتمنى تعجبكم وتجربوها ...وشي دعيوات لوليدات الله يحفظلكم ما عز عليكم ....تحياتي الخالصة بالتوفيق 

هناك تعليق واحد:

  1. تبارك الله عليك وصفة زوينة او سهلة تنفع للعشاء

    ردحذف